Yonhap៖ប្រធានា​ធិបតីស្តីទីកូរ៉េខាងត្បូងលោ​កHan Duck Soo​នឹងលាលែងពីតំ​ណែង​នៅថ្ងៃនេះ

យោងតាមទីភ្នាក់ងារសារព័ត៌មានYonhapប្រធានាធិបតីស្តីទីកូរ៉េខាងត្បូង លោក Han Duck Soo បានលាលែងពីតំណែង ដើម្បីចូលរួមប្រកួតប្រជែងជាផ្លូវការជាមួយបេក្ខជនផ្សេងទៀតនៅក្នុងការបោះឆ្នោតប្រធានាធិបតីនៅខែមិថុនាខាងមុខ។លោក Han Duck Soo ត្រូវបានគេរំពឹងថានឹងលាលែងពីតំណែងនៅថ្ងៃនេះ ថ្ងៃទី១ខែឧសភា ដើម្បីត្រួសត្រាយផ្លូវសម្រាប់លោកក្នុងការចូលរួមក្នុងការប្រណាំងដើម្បីក្លាយជាប្រធានាធិបតីថ្មីរបស់ប្រទេសកូរ៉េខាងត្បូង។នេះបើយោងតាមទីភ្នាក់ងារសារព័ត៌មាន Yonhap ។

លោកHan ត្រូវ​បាន​គេ​រំពឹង​ថា​នឹង​ថ្លែង​សុន្ទរកថា​ទៅកាន់​ប្រទេស​ជាតិ​បន្ទាប់​ពី​លាលែង​ពី​តំណែង​នៅ​រសៀល​ថ្ងៃ​ទី១ខែ​ឧសភា ហើយ​ប្រកាស​ជា​ផ្លូវការ​នូវ​បេក្ខភាព​របស់​លោក​នៅ​ថ្ងៃ​ស្អែក​ទី២ខែ​ឧសភា សម្រាប់​ការ​បោះឆ្នោត​ថ្ងៃ​ទី ៣ ខែ​មិថុនា។  Yonhap ក៏បាននិយាយផងដែរថា ព័ត៌មាននេះបានមកពីប្រភពអនាមិកនៅក្នុងរដ្ឋាភិបាល។

ប្រធានាធិបតីស្តីទីកូរ៉េខាងត្បូង លោក Han Duck Soo។រូបថត៖ REUTERS

បន្ទាប់​ពី​លោក Han លាលែង​ពី​តំណែង។ រដ្ឋមន្ត្រី​ក្រសួង​ហិរញ្ញវត្ថុ លោក Choi Sang Mok ត្រូវ​បាន​គេ​រំពឹង​ថា​នឹង​ធ្វើ​ជា​ប្រធាន​ស្តីទី​តាម​ច្បាប់​កំណត់។មានការរំពឹងទុកថាលោក Han អាយុ៧៥ឆ្នាំនឹងសម្រេចចិត្តឈរឈ្មោះបន្ទាប់ពីការស្ទង់មតិបង្ហាញការគាំទ្រកាន់តែខ្លាំងឡើងចំពោះអ្នកបច្ចេកទេសដែលមានបទពិសោធន៍។ការិយាល័យ​នាយក​រដ្ឋមន្ត្រី​មិន​បាន​ឆ្លើយ​តប​ភ្លាមៗ​ចំពោះ​សំណើ​សុំ​ការ​អត្ថាធិប្បាយ​ទេ។បន្ទាប់ពីមានព្យុះជាច្រើនចាប់តាំងពីខែធ្នូឆ្នាំមុនមក នយោបាយកូរ៉េខាងត្បូងកំពុងវិលត្រឡប់ទៅរកគន្លងមានស្ថិរភាព។បេក្ខជន​ខ្លាំង​បំផុត​នាពេល​បច្ចុប្បន្ន​គឺ​លោក Lee Jae Myung អតីត​មេដឹកនាំ​គណបក្ស​ប្រជាធិបតេយ្យ​ប្រឆាំង​នៅ​កូរ៉េ។ តាម​ការ​ស្ទង់​មតិ លោក Lee  តែងតែ​ដឹក​នាំ​គូ​ប្រជែង​របស់​លោក​ពី​គណបក្ស​អំណាច​ប្រជាជន​។ទោះ​ជា​យ៉ាង​ណា អ្នក​ណា​ដែល​ឈ្នះ​ការ​បោះ​ឆ្នោត​ខាង​មុខ នឹង​ប្រឈម​មុខ​នឹង​បញ្ហា​ជា​ច្រើន​ក្នុង​ការ​ដោះស្រាយ។ការលំបាកទីមួយគឺការឈានដល់កិច្ចព្រមព្រៀងពាណិជ្ជកម្មសមហេតុផលជាងជាមួយសហរដ្ឋអាមេរិកដែលជាសម្ព័ន្ធមិត្តនិងក៏ជាដៃគូពាណិជ្ជកម្មឈានមុខគេមួយរបស់ប្រទេសកូរ៉េផងដែរ។គេរំពឹងថា ថ្ងៃនេះ ថ្ងៃទី១ខែឧសភាតុលាការកំពូលនៃប្រទេសកូរ៉េខាងត្បូងនឹងប្រកាសសាលក្រមលើសំណុំរឿងលោក Lee ដែលត្រូវបានចោទប្រកាន់ពីបទភូតកុហក់ និងរំលោភច្បាប់បោះឆ្នោតនៅឆ្នាំ២០២២៕